logo.jpg

Teilnahme am Eidgenössischen Jodlerfest in Davos (Juli 2014)


C 5CUsers5CRonny5CAppData5CLocal5CPackages5Coice 15 974fa576 32c1d314 2dd15CAC5CTemp5Cmsohtmlclip15C015Cclip image002

Am Donschtig hei wier no z`lescht Mal a üsem Feschtlied gschliffä. Ds Lied „Chüejerscheid“, gschribe vo üsem Dirigent Simon Hefti, het üs scho vor erschte Üebig a geng gfallä, u jitz dörfe wier das us voller Fröid z Davos ga Vortragä! D Sarah isch am Abe no hurti gäge Hundsrügg uechi ä paar Bärgblüemeni für id Tracht u id Mütz ga reiche, u het am Morgä vor dr Abreis die Strüssleni bundä. Am Fritig morgä am halbi zächni, simer z Zwüsime voller Fröid u Zueversicht i ds Zügli gschtige. Da hets no grad ä chlini Uberraschig gä. Seewer Ruedi, dr Vater vo Patric, het alwä z`Gfüehl gha, wier chönnte uf dr füfehalbstündige Fahrt uf Davos vertrochnä, u het nis ä Chüelbox mit „ä paar“ Fläschleni feinem Wysswy u Gleser mit ufä Wäg gä. Mättu het wie geng no d`Tierwält mitgno für nis z`unterhaltä. Chum abghocket, si die erschtä Kommentare zu de Tierwält-Inserat gfalle. So si d Diskussione losgangä, was äch die „scharfe Ziege“ oder die „4-8 Jährige Zwergeselstute“ so uf sech heigi ? Ds Spiez simer du no uf anderi bekannti Jodlergsichter gstossä, u bi jeder Station sirä no meh derzue cho. Gäge Bärn si du o die erschtä Korke zoge wordä, u mit Späck, Ches u Brot hei wier äs fürnems, Znüni gnossä u afa Jassä. Vo Zürich nach Landquart simer mit em nä Basler-Klub im Abteil ghöcklet. Äs isch nid lang gangä, het mu änand wäg de Dialäkte afa azünde us luschtig gha. Z`Landquart simer z`lescht mal umgschtige. Da het mu scho vinechli Jodlerfeschtstimmig gspürt. D`Jodler hei gratis äs Öpfi u nes Fläschli Allegra-Wasser ubercho u si uf d Äxtrazüg igwise worde. Ds Davos acho, het nis Simon für nä Moment verlah, für a d`Jury-sitzig z`ga. Är het nämli si erscht Isatz am nä Eidg. Jodlerfescht als aktive Juror. Derwile si wier afä ga z`Hotel bezieh, u hei nis uf em Terässi  mit zwöinä vor Jodlergruppe Schwenden afä äs Aperöli gnemiget. Während dessi het d`Patroille Suisse ob üsne Chöpf ä paar Probeflüg tätiget. Wo mier du gäge z Jodlerdorf gloffä si, isch dr Fön zämebrochä u äs het i Ströme afa Rägne. Nach em nä chline Imbiss, simer gmüetlig gäge üses Vortragslokal trappet, für afä ga z losä wies tönt i däm Kongräss-saal. D`Sarah het grad chli komisch us dr Wäsch gugget wo si bim Lokal verusse am nä Port die viele Bärgrosebüsch het gse. Aber wemä sinet dass Davos uf 1560m isch, gfallt das denä Blüemeni halt o im Dorf una. Voll motiviert hei wier du guet igsungä u nes guets Gfüehl ubercho. D`Stimme si aller guet gsalbet u d`Fröid ufä Uftritt isch o da….. was bruchts no meh ?! Wos du am viertel vor Zäni glöggelet het, u mer voller Stolz uf d`Bühni igmarschiert si, hets du doch no afa pöpperlä gäge Hals uechi. Ir erschtä Strofä het nis d`Närvösi grad schier chli dr Atem gno u d`Stimmi hei enand no grad chli müessä finde. Die Zweiti u dritti Strofä isch du zimlech guet gangä, u ds Publikum het glub em Chlatschä na ä pleger Fröid gha a üs. Befreit vo däm Druck, simer umi i ds Jodlerdorf, wo scho ä pleger Chilbi im gang isch gsi. Mier müessä zuegää, die Davoser hei sich ä pleger Müei gä, dass äs urchigs, heimeligs Jodlerdorf isch entstandä. Äs isch nid wie a andernä Fescht uf dr Dorfstrass gsi, sondern im nä wunderschöne Park wo o schattespendendi Lerchä u Arve si gstande. I de Zält u a de Usseständ isch mu uberall i Gnuss cho vo feine Bündnerspezialitäte. Vo Steipilzrisotto uber Nusstorte, Salsiz oder sogar Ochs am Spiess u no vieles meh hets gä. Mier  hei nis du bim ne BBQ- Smoker zuechi gla u derzue nis äs guets Fläschli Veltliner gnemiget. Simon het nis du  nam z`Nacht verlah, will är am Samschtig dr ganz Tag dr Chopf u d Ohrä bir Sach het müesse ha. Verchöschtiget si mier anderä du no chli dür d`Jodlergass u du zu später Stunde gäge z Gliger „wellä“. Aber wies a settigne Feschtleni albä geit, het mu uf z`Mal no d Idee, dert wos am gmüetligschtä us emne Zältli use tönt, vlich no grad „hurti“ uf nä Schlummertrunk zuechi ds stüre. Vor luter Tanzä u singä hei mier du uf z`Mal Müedi umi nimme Gspürt u d Zit het mu o ganz vergässe. Womer du dr Zältusgang umi hei gfunde, hets scho taget u d Vögeni hei zwitscheret was gisch was hesch, äs het grad so tönt wie die o nes Jodlerfescht hätte. Nach em nä churze Power-Nuck het sech üses Grüppli  trennt. Hüt isches trochä u bewölkt, derfür sehr agnähm ir Temperatur. Martin u Patric hei ä Usflug uf d Schatzalp gmacht, da alli Aktive Jodler vo däm Fescht freie Zuegang uf sämtlechi Bärgbahne hei gha. Sehr ä grosszügegi Geste vo dä Davoser! Mathias u d Sarah si ar Jodlergruppe Schwenden ga d`Düme drückä u chli dä Vortragslokal nachi. Am speterä Namittag het sech du o d Sunne lengers wie meh zigt u äs isch ä schöne warme Abe im Amarsch gsi. Mier hei üse Träffpunkt im Vortragslokal vo de Flöschfroue abgmacht, für o inä ga d`Düme z drücke. Da me leider bi dä Lokal o nach uber nä Stund Wartezit ke Chance het gha ini z cho, isches nid allnä Müglech gsi dä Vortrag ga z`losä. Verusse hei wier du enand umi gfundä  u si gäge z Jodlerdörfli, wo du o Simon umi isch zue nis gstossä. Är isch o froh gsi Fyrabe z ha, äs sigi aber für ihn ganz ä schöni Erfahrig gsi. Bim Liede u Jutze hei mier o neui Kontakte dörfe chnüpfe u vil ufgstellti u glichgsinnti Lüt lehre kennä oder o nach langem umi mal gseh. Wär weis, vlich gits ja mal äs Jodlerreisli uf Arosa? Disi Nacht hei wier nid so lang möge uf ds Chüssi wartä wie die vorderi u si du mal gäge z`Hotel. Nach em z`Morge hei wier gspannt uf d`Klassierigslischte planget. Stolz hei wier üsi Note 2 dörfe i Empfang näh. Ziel erreicht! Z`fride u mitere tollä Portion Müedi, simer am zwölfi ds Davos uf z`Zügli gäge heim tschutschnet. Das Jodlerfescht wärde mier i beschter Erinnerig bhaltä. Äs isch ä Kunscht bim nä Fesch vo settiger Grössi, ä dermassä  gmüetlechi Athmosphäre chönne häre z`zoubere. Bravo Davos! Z`nächschte eidg. Jodlerfescht findet im 2017 in Brig-Glis statt, u mier hoffä doch sehr, dert o umi dörfe derbii z`si. Uf däm Wäg Gratulierä mier o ganz Härzlech dr Frouejodlergruppe Echo vom Flösch u der Jodlergruppe Schwenden zu ihrem Erfolg!

Horeflue Jutzer Saanenland